ZIBUSISO CONDRY MABONISA

 Izangelo zakoMabonisa UMabonisa, Umabonakude ngoba emude Ukuze abonele abanye ababonise Umthombo omile enkangala Omthambo igxume olwandle Olwandle lungasimanzi amunyu Kodwa olwandle luluju lujulukayo KoMabonisa akukhiwa kuyathatshwa Kanti othaphayo uthapha aze ancintike Usihlahla sithela ebusika Ngoba ehlobo sihlokoma IDewa elibanzi Eligeza ngochago Ngoba lithi amanzi alezinanakazana UMtshinda omkhulu Untombi zimlanda ehleli Zithi uxolo siza ngobuhle!  We mfokaMabonisa  Uqonywa ngabanjani Unhliziyo emhlophe Emhlophe lasezitheni UMoyo ngokosendo UMtshinda, Uvadlayila UDunugulu

  UMDLALO WESITHATHU ISIGCAWU SESIBILI Inkundla iyavulwa, kukoHlatshwayo emzini omdala, usekamelweni lakhe. Ufike wayangena ekamelweni engazange adle lutho, uNakaNdaba wahle wayifunda ivaliwe ukuthi lamuhla izinto azimanga kuhle. Ahle aqonde ngasekamelweni laye uNakaNdaba ngoba esebonile ukuthi isikhale yabubula ingungu. Amthole etshaye amangqetshane phezu kombeda, lokhe egqoke njengokuthi utshone enjani. NakaNdaba      : Litshona njani baba? Hlatshwayo      : [ etshengisa ukuthi ingqondo yakhe ikhatshana ] Ngitshonile. NakaNdaba      : Hawu baba, waziphosela embhedeni ungahlubulanga imvunulo yakho, lokudla awukadli kungabe konke kuhamba kuhle? Hlatshwayo      : [ evuka ehlala phezu kombeda ] Amukela nansi intonga yami NakaNdaba. [ amqhubele intonga yakhe ] NakaNdaba      : Hawu baba angithi uyazi nje ukuthi yintonga yemideni leyo, angeke ngayamukela mina. Loba besitsho...

 UZibusiso Condry Mabonisa uzalwa mhla zilitshumi lanye kunyanga kaMabasa ngomnyaka ka1994. Udabuka eKhezi lapho akhulele khona, ufunde ezikolweni izigoqela iMloyi Primary School, Tenson Hlabangane High School, Zamanyoni Secondary School kanye leDonkweDonkwe Secondary School. Uqale imfundo yaseYunivesithi ngoNcwabakazi womnyaka ka2018 njalo ukhangelele ukuqeda ngoNcabakazi womnyaka 2022. Uqhuba iBachelor of Social Science Honors Degree in Development Studies.  Ukuloba yinto azelwe eyifumbethe, kusukela eqala ukubhala igama lakhe nje wahle wakulangazelela ukuloba, kungakho-ke waze wafika ezingeni lokufisa ukukhupha ingwalo ezizabalwa ngabantu. Ukuloba ukusebenzisa njengendlela yokuletha imibono yakhe emphakathini. Akalobeli ukutshela abantu izehlakalo aseke wahlangana lazo, kodwa ulobela ukubatshengisa indlela abona ngakhona ukuthi izinto kumele zibenjani. Uthanda kakhulu ukuloba ngamasiko kanye lomlandu wamaNdebele, kungoba ekholelwa ukuthi amasiko yiwo azakhulula abantu abamn...